يوں نہ تھا ميں نے فقط چاہا تھا يوں ہو جائے

کسطرح آئے گی جس روز قضا آئے گی ؟

کچھ دن پہلے منیر عباسی صاحب نے یہ سوال فیس بک پر لکھا پھر اپنے بلاگ پر بھی پوسٹ کیا جب سے اب تک ذہن سے چپکا ہوا ہے۔۔ یہ ایک اور انداز سے قضا کی آمد دیکھی   گئی ہے۔

کسطرح آئے گی جس روز قضا آئے گی ؟

کیا خبر شور مچاتی ہوئی لہروں پہ سوار
کیا خبر خامشی بن کر کسی ویرانے کی
کیا خبر مجھ سے میرے گھر کا پتہ بھی پوچھے
کیا خبر اتنی اچانک کہ خبر تک نا کرے

عین ممکن ہے کہ آوارہ بگولے کی طرح
یوں اچانک چلی آئے کہ نظر تک نہ پڑے
عین ممکن کسی بچھڑے ہوئے ساتھی کی طرح
راہ میں چلتے ہوئے روک کے حیراں کردے

یہ بھی ہوسکتا ہے کہ ہنگامے بلا ہو جیسے
یہ بھی ہوسکتا ہے کہ مجھ کو پتا ہو جیسے
یہ بھی ہوسکتا ہے کہ ہر شخص قضا ہو جیسے
یہ بھی ہوسکتا ہے کہ خود اپنی قضا ہو جیسے