يوں نہ تھا ميں نے فقط چاہا تھا يوں ہو جائے

ہمارا نیا میک منی

لیجیے صاحب ایپل کی محبت میں‌ ایک قدم اور آگے بڑھاتے ہوئے ہم نے اپنا ذاتی میک منی آخر کار خرید ہی لیا۔۔ ڈیسک ٹاپ کمپیوٹر کی ضرورت کو پورا کرنے اور گھریلو ساختہ نیٹ ورک میں تنوع پیدا کرنے لیے میک کی ضرورت انتہائی شدت سے محسوس کی جارہی تھی جس کو ہم نے چھ سو ڈالر کی قربانی دے کر پورا کر ہی لیا۔

آپ اسکے سائز پر مت جائیے ۔۔آدھا کلو مٹھائی کے برابر اس ڈبہ میں‌ 1.83 گیگا ہرڑز  انٹیل کور ٹو ڈاؤ، ایک جی بی ریم،  950 جی ایم اے گرافکس پراسیسر، 80 جی بی ہارڈ ڈسک، ڈی وی ڈی کامبو ڈرائیو، وائی فائی، بلیو ٹوٹھ، چار یو ایس بی پورٹس اور اپنی نوعیت کے واحد سافٹ ویر شامل ہیں۔

اس وضع کے ساتھ اسکی قیمت 599 ڈالرز ہے جبکہ اسکے ساتھ سو ڈالرز کا ایچ پی پرنٹر فری گویا 499 ڈالرز میں پورا ڈیسک ٹاپ تیار اور وہ بھی ایسے کے پہلے سے موجود مانیٹر اور دیگر سازو سامان مکمل طور پر استعمال کے لیے موزوں۔ میری سب سے اہم فکر یہ تھی کہ اتنے برسوں ونڈوز ڈیسک ٹاپ استعمال کے بعد کیا یہ مکمل طور پر اس کا بدل ثابت ہوگا۔۔ تو جناب بالکل۔۔ کیمرا، موبائل فونز اور جو کچھ بھی کمپیوٹر پر استعمال ہوتا ہے سب کے سب اس کے ساتھ اسطرح‌ برتاؤ کرتے ہیں جیسے اسی کے لیے بنے ہوں۔ لینکس اور ونڈوز سے فائل شیرنگ تو اب کوئی مسئلہ ہی نہیں اور تو اور وی این سی کے ذریعے پورا ڈیسک ٹاپ آئی فون پر اٹھا کر مزے سے سڑک پر چہل قدمی کرتے ہوئے ڈیسک ٹاپ استعمال کریں۔

مائکروسافٹ‌کے اپنے بنائے ہوئے کئی ٹولز موجود ہیں‌ جیسے میک لیے میڈیا پلیر، میک کے لیے آفس اور میک کے لیے ایم ایس این میسنجر۔ اور مائیکروسافٹ کی اپنی ویب سائٹ سے آپ آر۔ڈی۔پی کلائنٹ ڈاؤنلوڈ کرکے ونڈوز سیشن میک پر رہتے ہوئے استعمال کرسکتے ہیں۔

دوسری فکر اردو کی تھی اور جناب اردو کی اب کوئی فکر نہیں‌۔۔ فائر فاکس اور سفاری دونوں‌میں سب ٹھیک ہے۔۔ لکھنا، پڑھنا، پڑھ کر لکھنا ۔۔ سب بالکل مناسب طریقے سے ہوتا ہے۔

آئی فون کے سافٹ ویر کی تیاری کے لیے یہ انتہائی قدم اٹھانا پڑا کیونکہ آئی فون کی ایس ڈی کے ابھی صرف اور صرف میک پر ہی دستیاب ہے لیکن اپنے اس اقدام سے نہ صرف یہ کہ خوشی ہوئی بلکہ وہ تمام لوگ جو ونڈوز سے تنگ اور لینکس سے خوفزدہ ہیں‌ انکے لیے میک منی ایک نہایت مناسب سودا ہے۔