يوں نہ تھا ميں نے فقط چاہا تھا يوں ہو جائے

یوم ٹیگ و یوم عکس بندی۔ ہفتہ بلاگستان کی خصوصی تحریر

ہفتہ بلاگستان اب آخری مراحل میں داخل ہوچکا ہے اور تاخیر کے سبب ٹیگ اور عکس بندی ایک ہی پوسٹ میں نمٹا رہا ہوں۔ ٹیگ کا سلسلہ شگفتہ صاحبہ کے بلاگ سے شروع ہوا اور پہلے ہی کئی لوگ اپنا ٹیگ نمٹا چکے اور مجھ تک یہ پہنچا جعفر کے توسط سے۔ تو یہ رہے کچھ جوابات جن میں دلچسپی کا عنصر ڈھونڈنا آپ کی اپنی ذمہ داری ہے اور ادارہ ہر قسم کے نتائج سے بری الذمہ ہے۔

آپ کا نام یا نک؟ اگر اصل نام شیئر کرنا چاہیں تو کر سکتے ہیں۔
راشد کامران۔ کیونکہ دونوں نام عموما پہلے نام کے طور پر استعمال کیے جاتے ہیں چناچہ کبھی کہیں آئی ڈی بنانے میں دشواری نہیں ہوئی

آپ کے بلاگ کا ربط اور بلاگ کا نام یا عنوان؟ بلاگ کا عنوان رکھنے کی کوئی وجہ تسمیہ ہو تو وہ بھی شیئر کر سکتے ہیں۔
ربط تو جی یہ رہا اوپر جس کے ذریعے آپ یہاں پہنچ ہی چکے ہیں۔ بلاگ کا نام اُسی خواہش کا تسلسل ہے جو فیض نے اس مصرع میں بیان کی ہے

آپ کا بلاگ کب شروع ہوا؟
پہلا اردو بلاگ ستمبر 2005 میں لکھا تھا لیکن منتقلی کی وجہ سے کچھ شروع کے بلاگ اس جگہ دستیاب نہیں۔

آپ اپنے گھر سے کون سے ایک ، دو یا زائد لوگوں کو بلاگنگ کا مشورہ دیں گے یا دے چکے ہیں؟ ربط پلیز
گھر میں تو جی سب مرضی کے مالک ہیں؛ ویسے بھائی بہنوں کو مشورہ دیا تھا لیکن گھر کی مرغی دال برابر۔

کوئی ایک ، تین یا پانچ یا زائد ایسے موضوعات جن پر لکھنے کی خواہش ہے مگر ابھی تک نہیں لکھ سکے یا آئندہ لکھنا چاہیں ؟
مکالمہ لکھنا ہے اور اچھے طریقے سے لکھنا ہے موضوع چاہے کوئی بھی ہو۔ مکالمہ لکھتے ہوئے بورڈ لڑکھڑا جاتا ہے۔

آپ کا بلاگ اب تک کس کی بدولت فعال یا زندہ ہے ؟ آپ خود یا کوئی دوسرا نام ؟ (مؤخرالذکر کی صورت میں نام بھی لکھ دیں۔ اگر ربط دیا جا سکتا ہے تو ربط بھی)
بلاگ تو لوگوں کی اردو سے محبت کی وجہ سے زندہ ہے کیونکہ کچھ لوگ مستقل حوصلہ افزائی کرتے ہیں تو انسان کی لگن میں بھی اضافہ ہوتا جاتا ہے۔

اپنے موبائل سے کم از کم کوئی ایک ، تین یا پانچ اچھے ایس ایم ایس شیئر کریں۔
ہمارے موبائل میں ایس ایم ایس کہاں۔ ای میلز ہیں جو کسی کے کچھ کام کی نہیں۔

آپ کی اردو زبان سے دلچسپی کس نام کے سبب سے ہے ؟ (استاد ؟ گھر کا کوئی فرد؟ یا کوئی دوسرا نام؟ یا کوئی الگ وجہ ؟)
مادری زبان ٹہری تو دلچسپی نا ہونے کا کچھ سبب بھی نہیں اور پھر حال دل کا بیان اسی زبان میں ممکن ہے۔

کیا آپ اردو بلاگ دنیا روزانہ وزٹ کرتے ہیں اور مختلف بلاگز کسی ترتیب سے وزٹ کرتے ہیں یا جو بھی بلاگ سامنے آ جائے؟ اپنا بلاگنگ روٹ شیئر کریں ۔
اردو بلاگ دنیا بالکل روزانہ وزٹ کرتے ہیں بلکہ گھنٹے گھنٹے میں وزٹ کرتے ہیں تو جو بلاگ جس دن لکھا جائے اسی دن پڑھ لیا جاتا ہے اور اردو سیارہ نقطہ آغاز۔

آپ کے بلاگ پر پہلے پانچ یا دس تبصرہ نگار کون سے تھے؟
میرا خیال ہے کہ میرا چھوٹا بھائی، ایک دوست عمران اور پھر میرا پاکستان والے افضل جاوید۔

ہفتہ بلاگستان یا اردو بلاگ دنیا سے مختلف تحریروں پر ہونے والے تبصروں میں سے چند دلچسپ یا مفید تبصرے شیئر کیجیے۔ ربط دینا نہ بھولیں ۔
تبصرے سارے جی شاندار ہوتے ہیں بلکہ کئی دفعہ تو بے جان تحریر پر ایسے جاندار تبصرے ہوتے ہیں کہ واہ واہ۔ ربط تو ڈھونڈنا ممکن نہیں لیکن میرا پاکستان کے بلاگ پر کچھ موضوعات اور ہم عورتوں کی کیوں گھورتے ہیں؟ والی تھریڈ پر تو کیا تبصرے ہوئے تھے جی۔

ہفتہ بلاگستان یا اردو بلاگ دنیا سے مخلتف تحریروں سے منتخب جملے جو آپ کو پسند آئے ہوں یا جنہیں آپ تعمیری اور مفید سمجھیں۔ (اگر تعداد معین کرنا چاہیں تو تین ، پانچ ، دس یا جتنے مرضی)
تمام لوگ اس ہفتہ چھا گئے ہیں لیکن عمر احمد بنگش نے ایک جملہ لکھا تھا “میں بڑا معصوم تھا، سبھی ہوتے ہیں۔ لیکن کچھ نہیں بھی ہوتے، جیسے نومی نہیں تھا“۔ واہ جی واہ میرا خیال ہے گولڈ میڈل عمر صاحب کا ہوا۔

ہفتہ بلاگستان کے بعد اب ہم “یوم بلاگستان” منایا کریں گے آپ کے خیال میں “یوم بلاگستان” ہر ہفتہ میں ایک دن منایا جائے یا ہر ماہ میں ایک دن منایا جائے؟
قدر کھو دیتا ہے روز کا آنا جانا۔۔ تو میرا خیال ہے یہ سالانہ کے حساب سے درست رہے گا تاکہ دلچسپی کا عنصر برقرار رہے یہ کیا جاسکتا ہے کہ منظر نامہ ایوارڈز سے تھوڑا پہلے اس کا انعقاد کیا جائے جس سے کمیونٹی متحرک ہو اور اس کے فورا بعد ایوارڈز کا انعقاد کرلیا جائے تو زیادہ لوگوں کی شراکت ممکن ہوگی۔

مختلف بلاگرز کو کوئی شعر یا جملہ انہیں ٹائٹل کے طور پر منسوب کریں۔
یہ تو  خاور صاحب نے گھڑیاں بنا کر بحسن خوبی منسوب کردیا ہے۔

ہفتہ بلاگستان اور بلاگ دنیا میں شامل تحریریں جو آپ کو پسند آئی ہوں؟
ہفتہ بلاگستان میں ساری تحریریں ہی ایک سے بڑھ کر ایک ہے جناب لیکن کچھ جو میں نے ایک سے زیادہ مرتبہ پڑھی یا کسی کو پڑھنے کا مشورہ دیا ہے ان میں
زیک کی اردو بلاگنگ والی تحریر
عمر احمد بنگش کی پچپن اور مرغبانی والی تحریریں
جعفر کا کھلا خط بنام سہراب مرز
خاور کی بلاگنگ کیا ہے والی
عنیقہ ناز کی کونسی تعلیم والی
ڈفرستان پر شائع شدہ ایک دونی دونی والی شاید دار نے لکھی تھی
میرا پاکستان کے افضل صاحب کی کتے والی۔ اور مزید کئی لوگوں کی جو فی الحال ذہن میں بھی نہیں

کن بلاگرز کو آپ کے خیال میں باقاعدگی سے لکھنا چاہیے ؟
میرا تو خیال ہے کہ تمام بلاگرز کو باقاعدگی سے لکھنا چاہیے تاکہ موضوعات اور اسلوب میں تنوع پیدا ہو خصوصا دو بلاگرز ابوشامل اور شاہ فیصل سے مؤدبانہ گزارش کی جاسکتی ہے کہ جناب کچھ بلاگ کا اور کچھ قارئین کا خیال کریں۔

ہفتہ بلاگستان کے بارے میں آپ کے تاثرات؟
توقع سے کہیں زیادہ کامیاب اور بلاگر کا جوش و خروش دیکھنے میں آیا۔

اس ٹیگ میں کوئی بھی ایک سوال اپنی جانب سے شامل کریں اور اس کا جواب بھی لکھیں؟
سوال ۔ پاکستان کی قومی زبان اردو، قومی ترانہ فارسی اور آئین انگریزی میں کیوں ہے؟
سوال۔ گھوڑا گھاس سے یاری کرے تو اسے کیا کھانا چاہیے؟

جو جو بلاگرز ابھی تک سلسلے میں شامل نہیں ہوئے ہیں اب سب کو ٹیگا جاتا ہے۔ خصوصا
منیر عباسی
محمد وارث
خرم بھٹی
شاہ فیصل
نعمان اور
ابوشامل سے گزارش ہے کہ مصروفیات سے کچھ وقت نکالیں۔